記者與被訪者大戰三百回合的「高質發佈會」

石先生好耐無去記者會，估唔到昨日的「樂視 X HKBN 發佈會」遇到久違的好採訪。如同前文「好專訪，不是一場秀，乃雙方真材實料的比拼」所講，一個好訪問應該係能夠問出痛處，記者與受訪者你來我往，問出重點才算好。

以往記者會的訪問鮮有如此「到肉」，即使是以往行家們在採訪「某電訊公司老細」時特別落力，也很少看到大家連續過招，你來我往三百回合，一般都係兩回定勝負。今日記者 A 與樂視老細能夠山腳打到上山頂，真係百年難得一見的「好經驗」，如果一眾在校學生能夠觀摩真是獲益良多。

話説，樂視及 HKBN 兩大老細講完合作砌低 NOW 的大計後，企係台上接受記者發問。第一個發問的記者 A 單刀直入，問樂視老細到底今日講個個 Plan 係咪包「英超」。做得樂視老細自然識番兩招太極，左掩右答，答你包哂「所有體育節目」，唔講「英超」二字。

記者好多時見咁嘅情況都唔再多問，但難得今次記者 A 再問，係咪即係有「英超」。樂視老細唯有回敬一句未來有好多節目，依家有嘅未來都有，有足球、高爾夫球及網球等等，包括埋記者 A 求先所講嘅，但自已口就死都唔講「英超」二字。

講到咁都唔嗡「英超」二字，好多時記者朋友都放過老細，但記者 A 貴為前誠信報，今天生果報記者，資歴有番咁上下，而且好明顯有備而來，當然唔會就咁算數，再出一招「怕寫錯」，請樂視老細幫手解疑難。

樂視老細見到高手，笑笑口之餘都想班救兵，希望公關或主持打圓場。點知難關面前奸細現形，主持竟然叫樂視老細不如直接啲答記者 A，真係買棺材唔知埞。

記者 A 直撃痛處、奸細又綁住自已唔俾走，樂視老細都無計可施，唯有來一招「語言偽術」，話肯定包括「英國足球賽事」，定你有得寫時，我又唔想講。

記者 A 得唔到答案，當然想繼續問，但真心朋友公關終於出現，係記者 A 剛剛問完上一句後就收番支咪，等佢無得再追問落去等老細難堪，算係做到野啦！

如是者，其他問題再來幾個回合，以為樂視老細平安度過。點知個咪唔知點解又去番記者 A 到，佢又同樂視老細講佢怕寫錯條題，問如果寫「樂視 x HKBN 新計劃包『英超』」有無錯，真係夠哂峰迴路轉。如果提早離場嘅朋友簡直係蝕到入肉。

問完又問再番問，樂視老細似乎也唔再堅持，突然好斬釘截鐵咁話：「係，包『英超』」，為尾聲將來高潮。

今次訪問除左奸細主持露出狐狸尾巴外，記者 A 當然做到野，迫到樂視老細講出「英超」二字；樂視老細被人由頭問到尾都無發火，出盡太極招數來迴避也都夠哂精彩，實在係難得高水準的發佈會。

經歴過上兩星期嘅樂視與 now 「有無得播」羅生門後，記者 A 要問到篤都真係唔出奇，而以石先生對樂視的理解，唔講到盡應該都係想等埋樂視老細口中個個「樂視體育套餐」，所以今次來回大戰三百回合，確係難得。

其實今次「樂視 X HKBN 發佈會」另一位老細 HKBN 嘅楊主光都好有高級表演，下文再同大家分享。