D-LINK DIR-879 開箱文，是時候把 Router 升級到 5G 了　 (119101)

是D-LINK DIR-879 開箱文，是時候把 Router 升級到 5G 了　這篇文章的首圖

Shares 110

提起 Router 好多朋友都會有疑問，例如屋企個個係咪太舊，駛唔駛換新，而如果換新又應該點揀，始終 Router 呢樣野雖然係實物，但用落又好虛無，都唔知點揀好？

Router 外貎睇落一樣，實際上已經變左幾代，情況就好似我地手機訊號由 2G 升級至 3G，進步到依家嘅 4G 咁，愈來愈快。你屋企個個十年前嘅 Router 分分鐘仲係停留係 2G 年代。

簡單咁講，Router 用嘅 Wi-Fi 制式以 802.11 為代表，早年嘅 Router 會寫 802.11a/b/g，a/b/g 係代表速度，而十年前嘅 Router 一般都係 802.11a/b/g，速度約 54Mbps；但五年前好啲嘅 Router 已經普遍支援提高左一級去到 802.11n，速度進入 150Mbps 時代。近年 Router 更開始進入 802.11ac 嘅階段，速度上升至 433Mbps，所以你如果問屋企個隻舊到舖塵嘅 Router 駛唔駛換，石先生可以答你一定要換！

從購買嘅角度去考慮，今時今日嘅 Router 係型號外好多時候已經有寫速度，代號寫法係 ACXXXX，以今次開箱嘅 D-Link DIR-879 為例，型號數字完全代表唔到任何野，但佢盒上嘅 AC1900 卻代表最重要的連線速度。

D-Link DIR-879 標示嘅 AC1900 其實代表 Router 係 2.4GHz 及 5GHz 呢個頻率上相加嘅速度。以 DIR-879 為例，其 2.4GHz 速度係 600Mbps，5GHz 速度係 1300Mbps，兩者相加就係 1900Mbps，而呢個數字也即係 AC1900。

以今時今日嘅 Router 來計，2.4GHz + 5GHz 有 1900Mbps 已經算夠用，因為大部份屋企嘅上網速度都未必超快，加上用嘅可能都係一兩部手機平板，係使用需求唔大嘅情況下，一台 AC1900 已經好足夠。

D-Link DIR-879 這類型的 Router 由於支援 802.11ac 制式，加上多天線指向設計，在體積上要比以往我地成日見到嘅細小 Router 要大，但體積與速度某程度上也都成正比，所以大家要換 Router 也都要留意空間嘅問題。

DIR-879 本身支援近年 Router 常見嘅 2.4GHz 及 5GHz 兩個頻率，2.4Ghz 覆蓋範圍大（對牆等穿透力較強）但速度較慢；而 5GHz 覆蓋範圍細但速度較快。D-Link DIR-879 嘅好處係佢本身將一個 Wi-Fi 訊號（SSID）集中處理 2.4GHz 及 5GHz，係使用嘅時候會自動幫你係 2.4GHz 及 5GHz 之間轉換，唔駛好似某啲牌子嘅 Router 咁，需要你自已係 SSID 個度二揀一，使用上會方便好多。

例如你個 Router 放係廳，而你又係廳，佢會幫你自動轉去用 5GHz，享受較快嘅速度，而如果你入左房，收 5GHz 無咁好，佢就會自動幫你轉用 2.4GHz，保證連線穩定性，唔駛驚斷下斷下。

開盒見到 D-Link DIR-879 呢隻 Router，你會發現佢有四支可開合嘅天線，各支天線除左可以加強覆蓋外，更因為支援 BeamForming 技術，令我地係唔同方向用嘅時候都更方便。

舉個例子，一隻 Router 四條天線，四條天線（東南西北）會分享連線速度。如果你個 Router 速度係 100，你企係東面就會用 Router 東面個條天線，速度會分薄至只有 25，但係 BeamForming 嘅技術下，Router 就會知道你用緊東面個支天線，佢就會加強番東面天線嘅速度，令你即使只係用東面呢支天線都可以有 50 或者 75 嘅速度，比以往來講都會強得多。

當然，係真實環境下你唔會只係用得一支天線，你會用到幾支天線發射出來嘅訊號，所以配合 BeamForming 技術下，你實際感受到嘅速度會比以往無採用嘅快，至於幾快就好睇當時你嘅環境及網速等其他因素啦！