係呢個時間，其實石先生應該寫專欄，唔應該寫呢篇文，但係放係心入面咁耐唔寫出來只會繼續有啲野勾住勾住，所以都係快快趣寫出來。
話說早輪 NOKIA 重生之作 NOKIA 6 已經係大陸推出左，大陸個邊宣傳上做左啲咩當然無留意到，但如果佢係香港推出行貨，係宣傳上俾你話事又可以點做呢？
作為玩機嘅人，好多時候都會望到啲缺點，但呢缺點可以點改善呢？除此之外仲有咩呢？呢個問題石先生想左一陣，有以下嘅不專業睇法。
開機要有懷念的聲音與握手
首先，NOKIA 6 作為生之作，其實唔算好有 NOKIA 特色，起碼情感上唔算好重，除左藍色及 NOKIA 字體不變，好多位仲可以改好啲。例如 NOKIA 6 開機畫面同一般 Android 機無異，可以嘅話加番 NOKIA 以前個握手動作，再加埋開機聲咁就正啦！
呢到講嘅開機聲唔係指鈴聲，係指開機握手個一下，呢下改變唔難，但開機個下情感會好好。
鈴聲與貪食蛇
除左開機鈴聲，NOKIA 手機令人懷念嘅另外兩樣野就係預設鈴聲及貪食蛇。
無錯！預設鈴聲聽落無特別，但其實好重要，因為依家大部份人都唔再特登換鈴聲，有番以前 NOKIA 嘅鈴聲做預設，感覺就同 ICQ 嘅「喔噢」一樣，不論係用家定係旁邊嘅朋友都特別親切，品牌效應感覺都強好多。
宣傳攻勢
除左呢啲咁基本野外，延續同一條路線，其實 NOKIA 仲可以做一啲唔太實用但好有 NOISE 嘅野出來，例如 NOKIA 可以寫一個 NOKIA 舊手機轉移資料 App 出來大做宣傳，來個自我傳承。
呢到講嘅轉資料 App 唔係講由 NOKIA Lumia 年代轉到 NOKIA 6，而係由 NOKIA 3310 個啲年代嘅款式嘅功能手機轉移資料到 NOKIA 6。講實要轉要嘅資料只係得電話簿及 SMS，Android 本身都做到九成，但有個咁嘅 App 搞笑味濃成本唔高，網路上博大家一笑提醒大家 NOKIA 真的回來了。
直接用手機邀請
宣傳上，其實有一招當年魅族用得幾好，NOKIA 真係可以照跟，就係係發佈會或大型活動上，買番一堆舊款嘅 NOKIA 手機或者低價嘅功能手機來做宣傳品。
呢招對於香港及中國手機線嘅記者來講未必好吸引，始終之前魅族做過，大家都知，但如果其他版面嘅應該好有驚喜，寫番篇文，幫你出下 Facebook 都唔係出奇，呢啲宣傳好過落 Facebook 廣告。
玩手機型號
依家啲手機型號咁鬼悶，係咁 1 2 3 4 5 6 7，一個一個加上去真係幾無。NOKIA 新得來又有歷史，好適合重新玩過。每一部手機唔好叫咩 NOKIA 6、NOKIA 8，直接玩大啲，叫做 NOKIA 6610、NOKIA 8810、用番四個數字來玩，每個對應番以前一款手機，有排你玩。
講咁耐，石先生呢啲 IDEA 當然係啲細位來，大位點做廣告，成個 Campign 呢啲點做，Global 應該有哂指引，但係係可行嘅範圍內加番啲懷舊元素，咁樣成件事會更正。其他野仲可以點玩？拍片可以點？寫文可以點？有機會再慢慢講，做番啲正經事，寫番個搵食專欄先～
【此文章刊載於 石先生部落；標題： 重生的 NOKIA 欠缺什麼？專注這些細節宣傳會更有感覺；本篇文章為贊助內容；強制廣告： HisTrend.HK 給你不一樣的科技產品】
