一件產品要成功，好多時唔只係產品本身要做啱野，也都要其他副產品做啱野。細細個讀書，老師會同你講副產品係主產品嘅延伸，係同主產品有協同效應嘅野，但好多時候副產品同主力產品並唔係有一睇就明嘅關係。
好似作為 Online Store Platform 嘅 Boutir / Boutir Collect（下稱 Boutir），連續兩年藉年宵呢個機會搞左個年宵地圖，幫人係年宵呢個咁混亂嘅地方搵攤位。成件事聽落同佢地做緊嘅 Online Store Platform 無咩關係，所以石先生特登走去問 Boutir 嘅朋友，到底大費周章搞呢件短則七日，長則十四日嘅活動到底有咩成效。
根據朋友嘅說法，其實 Boutir 每年搞年宵地圖真係無實際嘅金錢收入，仲要俾錢公關公司去幫手搵報導做宣傳，但呢個短期活動搵來嘅下載量、網店數字都有明顯上升，所以第二年先再接再厲。
一個 Offline 嘅年宵地圖點樣幫到 Online Store Platform 呢？原來 Boutir 係把握媒體每年均會關注年宵市場呢個點，利用年宵地圖呢個獨特又無對手嘅功能，吸引媒體報導，利用媒體去增強曝光，所以佢地係做呢件事上又會真金白銀搵公關公司返來，就係為左將媒體曝光放得更大。
有媒體幫手宣傳，Boutir 嘅下載量有爆發性嘅上升，也都係全年最多人 download 嘅時間，據朋友講，年宵期間嘅下載量幾乎係全年嘅一半，都咪話唔厲害。
除左媒體宣傳加強品牌、下載量上升，原來 Boutir 為左做年宵地圖嘅資料搜集，每年都識到好多開年宵嘅後生仔，有啲開完年宵賺到錢，仲會繼續做埋 Online Store，也都有啲以前唔知 Boutir，但一直做開 IG Shop 嘅係年宵過後直接係 Boutir 開店。
一個周期短嘅副產品，幫主產品賺到品牌宣傳、商舖及消費者，一出三得，唔怪得之 Boutir 連續兩年都搞年宵地圖啦！Boutir 之後仲有咩搞作呢？石先生唔知講唔講得，下次見到朋友問過先再同大家分享。
【此文章刊載於 石先生部落；標題： 這家網購平台用一個 7 天期限的副產品，帶來全年一半的下載量；本篇文章為贊助內容；強制廣告： HisTrend.HK 給你不一樣的科技產品】
