全球12大奢華機場貴賓室

2014.12.16 05:20PM
2353
全球12大奢華機場貴賓室

 

每次去旅行都係一個唔同既經驗。有時可能無驚無險,但有時就會有啲不愉快經歷,搞到你有排都唔想再坐飛機。但如果你可以唔使喺機場同人迫,重可以享受好似酒店或者Spa咁一流既設施同服務,咁就唔同講法啦!

b9a31d3949b1882a09ed2f8508d538f3

如果你經常出TRIP去旅行,或者信用卡有旅遊優惠既話,對機場貴賓室應該唔會陌生。機場貴賓室呢啲咁豪華既地方,係為左VIP乘客而設。想像一下,旅遊旺季既機場人迫迫,想食野又要排,去廁所又要排,分分鐘連位都唔多個!呢個時候,機場貴賓室簡直係天賜既禮物。

不過,稱得上係奢華機場貴賓室,當然唔止係有個地方落腳咁簡單。除左基本野之外,重有一大堆高級設施任用,務求連最刁鑽既客人都服待得貼貼服服。MoneyHero為你搜羅左全球12間奢華機場貴賓室,有啲豪華到真係連五星級酒店都要企埋一邊呀!(以下排名不分先後)

1. Lufthansa First Class Lounge (漢莎航空@法蘭克福機場)

 

Lufthansa - Luxurious Airport Lounges

漢莎航空既貴賓室喺法蘭克福機場第1航廈附近。點解係喺航廈附近,唔係喺入面?因為呢間貴賓室十分巴閉,已經唔止係一間「貴賓室」,而係成幢獨立既2層貴賓大樓!當然,要用尊貴服務就要付出代價,只有頭等客艙乘客和HON Circle會員先至用得架。

佢入面既設施真係有咁豪得咁豪,唔止有私人雪茄房,重有私人助理幫你搞登機手續,代客泊車,連登機都有專車接送。VIP重可以享用私人休息室訓覺,或者喺浴室沖涼,連黃色沖涼鴨仔都會準備好等你!

2. Al Mourjan Business Lounge (卡達航空@多哈哈馬德國際機場)

 

Al Mourjan - Luxurious Airport Lounges

卡達航空呢家五星級航空公司為左令乘客覺得賓至如歸,一啲都唔手軟。繼之前喺舊多哈國際機場起左一個私人航廈比頭等同商務艙客人,宜家又有新搞作,喺新既多哈機場3樓,起左個一萬平方米,全球最大既貴賓室!貴賓室維持卡達航空一貫既高水準,入面裝修典雅,融合左傳統阿拉伯風格。

頭等同商務艙乘客可以係入面用獨立沖涼房啲就唔再講,野食方面,除左fine dining,重有自助餐食。咁都唔止,每個私家位都有自己一個螢幕,玩咩都得!除止之外,最勁既就係佢地既遊戲室,有仿古玻璃足球機,同埋1比1既F1賽車模擬器,真係可以坐入架車度玩架!

3. Virgin Atlantic Clubhouse (維珍航空@倫敦希斯路機場)

Virgin Atlantic - Luxurious Airport Lounges

Virgin Atlantic Clubhouse位於倫敦希斯路機場既第3航廈。要數全球最正既機場貴賓室,呢個位於英國最繁忙既機場既貴賓室,每次都一定榜上有名。Virgin Atlantic Clubhouse只係比維珍航空既「非凡Suite」乘客同埋維珍飛行會金卡會員先可以用。貴賓室既裝修行復古路線,除左一流既餐廳、酒吧之外,當然唔少得特別既設施,包括可以SET頭、剪頭髮、修甲既SALON,重有水療中心做Spa,重有得免費上網添!

其實維珍航空其他貴賓室都相當出名,例如紐約既甘迺迪國際機場,或者倫敦既格域機場既貴賓室都一樣令人讚不絕口。

4. La Première Lounge (法國航空@巴黎戴高樂機場)

 

La Premiere - Luxurious Airport Lounges

巴黎戴高樂機場既第2航廈,設有法國航空全新打造既La Première Lounge,為VIP乘客提供度身訂度既服務。貼心服務包括:簡單快捷CHECK-IN、高級轎車接送、行李運送等等…

貴賓室入面有舒服既空間,比你做野或者休息,重有全身按摩、SPA,米芝蓮大廚Alain Ducasse設計既餐單,圖書室等等…重可以用埋法航既APP下載報紙雜誌,喺機上面睇!

5. The Centurion Lounge (美國運通卡@三藩市國際機場)

 

Centurion - Luxurious Airport Lounges

呢間貴賓室係2014年11月先開幕,位於三藩市國際機場既第3航廈,旅客諗到想要既野,佢都有!例如秘書服務,會幫你book野同預約餐廳等等…重有獨立工作間,大電視比你打機或者睇戲,重有米芝蓮大廚主理既餐飲!貴賓室重同好多公司同品牌合作,一啲都唔馬虎,例如入面用既護膚品就係用由L'OCCITANE提供既。

好多貴賓室都係由航空公司打理,但呢個就比較特別,係少數由信用卡公司提供既貴賓室。只要你係美國運通卡持卡人,就可以用,比起其他要坐頭等或者商務艙先入得既貴賓室,親民得多。所以下次如果去三藩市,千其唔好走寶!

6, 7. 「寰宇堂」,「玉衡堂」 (國泰航空@香港國際機場)

ThePier - Luxurious Airport Lounges

TheWing

唔使下下覺得外國月亮圓啲,其實我地香港機場都有兩個豪華機場貴賓室!

「寰宇堂」係國泰航空既旗艦貴賓室,位於離境大堂南客運廊1-4號閘口附近。入面再分左「頭等貴賓室」同「商務貴賓室」,環境舒服,佈置簡約得黎,又不失時髦既感覺。最正既係,入面有好多VIP專享設施,唔止酒吧、閱讀室、會議室、私人淋浴間、連buffet都有得你食!

而「玉衡堂」就喺西北客運廊5樓,閘口62-66號附近,係國泰航空新開既貴賓室。「玉衡堂」既賣點就係「風味坊」,入面有唔同CAFE,重有即製麵食。同時,重有商務中心連全天候WIFI。

國泰航空其實喺香港機場重有三個貴賓室:「逸連堂」、「爾雅堂」同「賞心堂」,真係行都邊都可以享受頂級服務!

8. The Royal Orchid Lounge (泰國國際航空@曼谷素萬那普機場)

RoyalOrchid - Luxurious Airport Lounges

泰航頭等同商務艙乘客,如果想坐完長途機之後放鬆下,就可以去曼谷素萬那普機場E客運廊既Royal Orchid Lounge。餐廳、沖涼房、商務中心呢啲就唔少得架啦,Royal Orchid Lounge重有個人音響室同睡房(冇錯,係真係睡房!唔係休息區),最啱需要靜靜地休息,或者需要補眠既旅客。

另外,位於D客運廊既SPA貴賓室都係一大賣點。如果你係皇家頭等艙或者皇家客艙既乘客,就可以享用健身房、Jagucci、傳統泰式按摩!聽落真係好吸引!

9. Etihad Premium Lounge(阿提哈德航空@阿布達比國際機場)

 

Etihad - Luxurious Airport Lounges

其他野唔睇,淨係見到個地點係阿布達比國際機場,即係「阿拉伯聯合大公國阿布達比酋長國」,就知呢間貴賓室係頂級奢華既代表。

Etihad Premium Lounge位於第3航廈既閘口35附近。一樣都係有野食、沖涼房、商務中心等等…特別之處在於佢有水療中心可以做spa,而如果你有小朋友一齊,做SPA既時候重有保姆會幫你湊小朋友,服務實在太周到啦!唔止咁,佢地重有秘書服務(即係好似黑卡嗰種),可以幫你搞掂落黎去旅行未BOOK既野,拎你啲衫去洗等等…

10. Qantas International First Lounge (澳洲航空@悉尼國際機場)

 

Qantas - Luxurious Airport Lounges

悉尼國際機場入面既Qantas International First Lounge有一系列既設施可以用,唔止舒服,重好方便。除左最基本既沖涼房(有埋化妝品,真係好貼心!)同餐廳之外,重有會議室、SPA、上網區(全部都係用APPLE電腦架),同埋有齊最新報紙雜誌既圖書室添!喺入面等轉機或者DELAY都大把野做。

要用貴賓室,就要係澳航同埋阿聯酋航空既頭等艙乘客,澳航飛行常客白金卡會員,或者指定寰宇一家成員。

11. SilverKris Lounges (新加坡航空@新加坡樟宜機場)

 

SilverKris - Luxurious Airport Lounges

SilverKris Lounges 廿四小時開放,喺新加坡樟宜機場既第2同第3航廈都有,只限頭等艙、商務艙乘客,或者新航PPS俱樂部會員使用。佢既設施包括各種冷熱食物、私人沖涼房、商務中心(連WIFI)、育嬰室等等…最正既地方係有無敵大海景,同埋電視休息區!

12. Golden Lounge (馬來西亞航空@吉隆坡國際機場)

Malaysia Airlines - Luxurious Airport Lounges

馬來西亞航空既Golden Lounge係佢地既旗艦貴賓室。比起其他我地介紹左既貴賓室,Golden Lounge可能比較低調,但佢啱啱翻新,加上各種設施應有盡有,對成日要喺亞洲出trip既人既講,值得佔一席位。

Golden Lounge位於吉隆坡國際機場既A客運大樓,專為頭等同埋Enrich Platinum既會員而設。喺入面有自助餐同埋其他餐點、私人睡房、沖涼房、商務中心、電腦連上網、酒吧、回教祈禱室同埋育嬰室。

————

睇左咁多間貴賓室,係咪好想快啲去晒佢?不過上面間間都要頭等或者商務乘客先入得,一般市民真係得個恨字。不過,唔使灰心住!上次我地都有講過,有幾張信用卡係可以享用免費環亞貴賓侯機室服務!可以過一過鋪貴賓癮。就算你坐唔到頭等或者商務艙,有好多貴賓室都可以比VIP乘客帶一個人入去,所以大家要帶眼識人啦!

另外,有個叫Loungebuddy既APP,可以幫你好快搵到最近又最靚既貴賓室;而Business TravellerAirline Quality呢兩個網頁就有唔同評論,針對貴賓室既野食、清楚程度、服務、上網表現等等評分。

————

準備去旅行?唔好唔記得買定旅遊保險,你知啦,意外就係意料之外嘛。睇下MoneyHero既旅遊保險頁面,用我地既網上比較工具,搵份最抵既旅遊保險啦!www.moneyhero.com.hk

你或許會喜歡

不慣EYE和Desire 820 現在鄉民推薦的中階主流是E8

有收藏的價值 炫耀度100分的投影虛擬鍵盤

回應 0
新奇搞笑
可豪華、可簡約也可以攜帶的充氣沙發組
Twelve
20 個小時前
新奇搞笑
專為桌遊設計的攜帶背包
Twelve
21 個小時前
新奇搞笑
單眼相機的500萬大傘-Camera Canopy
Twelve
5 天前
新奇搞笑
酒鬼的浪漫-用軟木塞製成的小玩具
Twelve
6 天前

熱門文章

最新消息

本日精選